A prima Tröpfle!
Es ist solang noch goar net her –
So drei, vier Wochen ungefähr,
doa hot a Moh moal krank gefeiert,
weil ihn sei Moge hot geleiert.
Von Dokter woar er krank geschriebe;
Dröm is er a dahämmgebliebe.
Sött die Fraa, „du bist dehemm,
koste a moal in die Schwämm
un außerdem machst du ´n Wei
un lehst a noch die Gorke ei.
Es ist jo alles schue parat,
Zucker ho ich aufgespoart“.
„Kochst halt noch moal oh die Hifte,
merkst ja selber, wenn se düfte.
Un die Gorke wöschte tüchtig,
erscht es eilechst – dos is wichtig!
Un es Salz, du wäßt wus stätt –
ofs Schook ä Pfund Salz, mehr ower nett“.
„Also, mach die Sache richtig;
Ich kenn dich jo, du bist goar tüchtig“.
Der Moh hot kaum halb hie gehürt,
er hot die Hifte schue gerührt
un dacht für sich: gea fort du Luder;
diesemoal werd der Wei a guter!
Also blieb der Moh allä
un sei Sorge woarn net klä …
Ocht Toe drauf – nä neun genaa,
woar schue widder doa die Fraa:
„Moh, sött se ich bin defür –
Die Gorke könnt me moal probier.
Heut zu unnern Sonntigsbroate –
Ich hoff ´se senn dir gut geroate.“
Er läßt sich dos net zwämoal soe,
sei Fraa sollt sich schue net bekloe,
macht gleich sich übersch Gorkefoß,
nimmt Gorke raus – die woarn famos;
wenigstens so sahn se aus.
Der Moh erwärt nu sein Applaus …
Sie schneid die Gorke gleich in Stückle,
probiert se un macht klänne Schlückle …
„Ho Moh, wos fällt die denn ner ei –
dos sollte doch Salzgorke sei.
Menschenskind, toatst du´s net merke?
Dos senn die ränste Zuckergorke!“.
„Wos Zuckergorke?“ schreckt er auf,
„doa gätt doch a Lämple auf:
nu wunner ich mich goar net mehr,
daß unner Wei will goar net gär,
doa ho ich doch dos Salz direkt
als Zucker in dan Wei nei gschteckt“.
„Und an Zucker in die Gorke –
Dunerschlog, ich bin a Marke! –
Jetzt is alles bädes hie. –
Blei dahemm Fraa – brauchst net nü“.
Drauf is der Moh, so in sein Zorn,
erscht noch richtig krank geworn.