A vürnamer Hund
Es woar oh’n Sonntich vürmittog –
´n Sommer in de Hitz.
Schporziergänn konnt än net behog –
doa musst me zu sehr schwitz.
Dröm stellte sich zum Schoppe ei
a Stück vier, fünf Herrn.
Der ä hot noch sein Hund debei –
es woar beim Kätsch im ,Stern’.
Heubnersche Tropfe gut of Eis –
´s beste gege schwitze.
Die trank me doch gleich gläserweis
im stenn und im sitze.
Nu blieb a net der Hund allää
unter sein Tisch liege,
er schnuppert oh die Hosebää
un sucht sich sei Vergnüge.
So Schnüffelei die bringt wos ei –
of´n Sonntich ömmer.
A guter, neuer Stoff müsst’s sei –
annerscht toat ersch nimmer.
Un wie er nu beim Richtge woar,
hot er’s Bää gehobe –
ganz leis natürlich dos is kloar –
zu schpät koam Wind vo obe:
„Verfluchter Köter“ schreit der Moh,
„wos fällt dir denn ner ei?
oh mein beste Ozuch nu – nä,
so a Schweinerei!“.