Die Saujagd
Fünf Männer hon ´n Wald durchkämmt
in de Finsterleite,
die Flinte untern Ärm geklemmt,
es Messer o de Seite.
Ball koam a Wildsau ohgeronn,
querab voon erschte Schütze …
Der sieht´se, macht´n Finger krumm
un – Krach! – toat´s a schue schprütze.
Poar Burschte floge gleich drömröm
mitsamt´n Fetzle Schwärte,
die Sau bleibt schtänn un guckt sich öm,
doch doad se net lang wörte:
sie sieht dann Schütze un hopphopp
toat se mach´n schpure,
öm ihn gleich in Schweingolopp
in Erdbod nei ze buhre …
Der Jäger woar noch ziemlich jung,
er macht kä lange Gschichte,
jedoch ´n lange Seiteschrung
un schwupp – nauf of ´ne Fichte ….
Der zwätt Jäger schtun net weit davo,
die Sau hat sich röm gschmisse,
un noahm schnurgrod dan zwäte oh –
der dacht goar net on´s Schisse.
Er brüllt die Sau oh wie a Schtier,
un fuchtelt mit sei Flosse:
„Dumm Sau wos wißte denn vo mir –
ho ich vielleicht geschosse!“.